Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Aleancës për Kosovën, Ramush Haradinaj, ka përgëzuar qytetarët dhe institucionet për organizimin e zgjedhjeve lokale me standarde të larta demokratike. Ai theksoi se dita e djeshme konfirmoi fuqinë politike dhe stabilitetin e Aleancës. Haradinaj njoftoi se partia e tij ka fituar në pesë komuna ku ka qeverisur dhe do të jetë në bashkëqeverisje në mbi 10 komuna të tjera. Në kuvendet komunale, Aleanca përfaqësohet me 98 asambleistë. Ai shprehu mirënjohje për aktivistët dhe strukturat e partisë, veçanërisht për ata në Diasporë, si dhe për 87,358 qytetarët që e mbështetën projektin politik të Aleancës. Haradinaj falënderoi kryetarët e komunave fituese: Ardian Gjini në Gjakovë, Bali Muharremaj në Suharekë, Bashkim Ramosaj në Deçan, Smajl Latifi në Rahovec dhe Zenun Elezaj në Klinë, duke i vlerësuar si shembuj të qeverisjes së përgjegjshme dhe punës konkrete për qytetarët. Ai përfundoi duke theksuar se modeli i qeverisjes së Aleancës sjell ndryshime reale dhe pozitive dhe se partia do të vazhdojë me rezultate edhe më të mëdha në të ardhmen.
