Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Aleancës për Ardhmërinë e Kosovës, Ramush Haradinaj, ka bërë thirrje për tejkalimin e krizës institucionale në Kosova, duke theksuar se vendi po përballet me një situatë të rënduar ekonomike, politike dhe të sigurisë. Në një reagim publik, Haradinaj ka vlerësuar se vendi ndodhet në një udhëkryq dhe se kriza aktuale është rezultat i interesave personale dhe partiake që, sipas tij, kanë penguar gjetjen e një zgjidhjeje institucionale. Ai theksoi se gjendja aktuale është jonormale dhe në dëm të shtetit dhe qytetarëve, duke shtuar se ata që kishin përgjegjësinë për ta zgjidhur situatën nuk arritën ta tejkalojnë veten për të mirën e përbashkët. “Kjo gjendje krejtësisht jonormale dhe në dëm të shtetit e të secilit prej jush është krijuar për shkak se ata që do të duhej t’i jepnin zgjidhje kësaj situate nuk e kaluan veten e tyre, por u mjaftuan me interesa personale e partiake”, ka shkruar Haradinaj. Sipas tij, Kosova është në “metrat e fundit” për t’iu kthyer normalitetit institucional dhe kërkohet bashkim i atyre që janë të gatshëm të vendosin interesin e vendit mbi atë personal apo partiak. Haradinaj gjithashtu ka theksuar rolin historik të njerëzve që, sipas tij, në momentet më të vështira kanë ditur të rreshtohen drejt dhe të qëndrojnë pranë aleatëve ndërkombëtarë, në veçanti me Shtetet e Bashkuara të Amerikës.
