Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Aleancës për Ardhmërinë e Kosovës, Ramush Haradinaj, ka përkujtuar sot 27-vjetorin e Masakrës së Reçakut, duke bërë homazhe në Kompleksin Përkujtimor në nderim të 45 shqiptarëve të paarmatosur të masakruar nga forcat serbe më 15 janar 1999.
Haradinaj ka theksuar se Masakra e Reçakut, ashtu si edhe masakrat e tjera të kryera ndaj popullit shqiptar, përbën dëshmi të qarta të krimeve gjenocidale që aparati shtetëror serb ka kryer në Kosovë. Ai ka nënvizuar se këto krime mbeten plagë e hapur, por edhe dëshmi e sakrificës për liri.
Në këtë përvjetor, Haradinaj ka shprehur mirënjohje të përhershme për ambasadorin amerikan William Walker, i cili e cilësoi Masakrën e Reçakut si krim kundër njerëzimit dhe ia bëri të ditur botës së vërtetën për krimet serbe në Kosovë.
Po ashtu, ai ka falënderuar Shtetet e Bashkuara të Amerikës, duke theksuar se ato ishin dhe mbeten përherë krah Kosovës në të gjitha periudhat historike, veçanërisht në momentet më vendimtare për lirinë dhe shtetndërtimin e vendit.
Haradinaj ka përfunduar duke nderuar dëshmorët dhe martirët e Reçakut, sakrifica e të cilëve mbetet themel i lirisë dhe pavarësisë së Kosovës.
