SHFMU “Ibrahim Mazreku” shënoi Ditën e Shkollës

02/06/2025 Institucionet

Sot, Shkolla Fillore dhe e Mesme e Ulët (SHFMU) “Ibrahim Mazreku” në Malishevë ka shënuar Ditën e Shkollës, datë që lidhet me 26 vjetorin e rënies së dëshmorit dhe heroit të kombit, Ibrahim Mazreku, emrin e të cilit kjo shkollë e mban me krenari.

Në këtë ngjarje morën pjesë edhe kryetari i Komunës së Malishevës, Ekrem Kastrati, nënkryetari Vesel Krasniqi, kryesuesi i Kuvendit të Komunës, Argjend Thaçi, përgjegjësi i Drejtorisë për Arsim dhe Edukim, Sabit Berisha, si dhe zyrtarë të tjerë.

Paraprakisht, kryetari Kastrati, bashkë me bashkëpunëtorët e tij, me përfaqësuesit e shoqatave të dala nga lufta dhe familjarët, bënë homazhe dhe nderime në varrezat e dëshmorëve, në shenjë respekti dhe përkujtimi për veprat e Ibrahim Mazrekut, Ejup Kryeziut, Kujtim Krasniqit dhe Milaim Behës.

Në fjalën e rastit, kryetari Kastrati e uroi këtë institucion arsimor për ditën e shkollës, duke u dëshiruar suksese të mëtejshme. Ai gjithashtu foli për veprën e dëshmorit dhe heroit të kombit, Ibrahim Mazreku, me të cilin kishte qenë bashkëpunëtor, si dhe për rëndësinë e luftës së lavdishme dhe sakrificën e dëshmorëve të kombit.

Ndërsa drejtoresha e SHFMU “Ibrahim Mazreku”, Rrezarta Mazreku-Kastrati, foli për të arriturat e shkollës gjatë këtij viti shkollor, për pjesëmarrjen në gara të ndryshme, aktivitetet brenda dhe jashtë shkollore.

Gjithashtu, nxënësit e shkollës shfaqën një program artistik dhe u promovuan katër vepra me autorë nxënës të kësaj shkolle.

Të pranishmit në këtë aktivitet i përshëndeti edhe djali i dëshmorit, Ibrahim Mazreku, Adhurimi, i cili i falënderoi për kujdesin dhe respektin që institucionet tona tregojnë ndaj dëshmorëve, si dhe uroi të gjithë nxënësit dhe mësimdhënësit.

Kontrolloni gjithashtu

Përkujtohen dëshmorët Ahmet Baqaj, Rexhep Mazrekaj, Selmon Dukaj dhe Altin Haskaj

Kryetari i Komunës së Deçanit, z. Bashkim Ramosaj bashkë me nënkryetarin, z. Sami Cacaj, Kryetarin …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara