Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në prag të sezonit turistik veror dhe përballë fluksit të shtuar të qytetarëve dhe automjeteve nga Kosova, është firmosur një Memorandum i Bashkëpunimit ndërmjet Policisë së Shtetit të Shqipërisë dhe Policisë së Kosovës. Marrëveshja synon organizimin e shërbimeve të përbashkëta të policimit rrugor në territorin e Shqipërisë, duke filluar nga data 1 korrik 2025. Memorandumi u nënshkrua nga Drejtori i Përgjithshëm i Policisë së Shtetit, Drejtues Madhor Ilir Proda, dhe homologu i tij nga Kosova, Kolonel Gazmend Hoxha. Palët u zotuan për një bashkëpunim të ngushtë me qëllim rritjen e sigurisë rrugore, menaxhimin efikas të trafikut në akset kyçe dhe shkëmbimin e përvojave më të mira profesionale. Drejtori Proda e cilësoi këtë bashkëpunim si një dëshmi të harmonisë ndërinstitucionale dhe angazhimit të përbashkët në luftën kundër paligjshmërisë, ndërsa Kolonel Hoxha tha se pjesëmarrja e efektivëve kosovarë është një nder dhe përgjegjësi për shërbimin ndaj qytetarëve në territorin shqiptar. Ky bashkëpunim ndërkufitar përforcon besimin mes dy institucioneve dhe synon garantimin e një sezoni të sigurt dhe të qetë për qytetarët e të dy vendeve.
