Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Procesi gjyqësor ndaj krerëve të UÇK-së në Hagë pëson sërish shtyrje, pasi gjyqtarët e rastit, më 29 maj, miratuan pjesërisht kërkesën e Prokurorisë për pranimin e disa provave të reja, të cilat përfshijnë raporte ndërkombëtare, artikuj mediatikë, video dhe intervista të ndryshme. Kjo ka detyruar shtyrjen e afatit për dorëzimin e mocionit të mbrojtjes për rrëzimin e akuzave. Fillimisht, dorëzimi i mocionit ishte parashikuar për datën 2 qershor, por sipas dispozitave të mëparshme procedurale, afati i ri tani pritet të jetë rreth datës 10–12 qershor, duke iu dhënë avokatëve kohë shtesë për të reaguar ndaj provave të fundit. Ata pretendojnë se Prokuroria ka dorëzuar mbi 500 dokumente brenda pak javësh, përfshirë materiale që – sipas tyre – nuk kanë vlerë provuese dhe shërbejnë vetëm për të komplikuar dosjen. Në parashtresat e dorëzuara, mbrojtja thekson se shumë nga dokumentet përmbajnë thashetheme, deklarata nga individë të paidentifikuar dhe intervista që nuk janë vërtetuar nga dëshmitarë ose autorë. Pas dorëzimit të mocionit nga mbrojtja, Prokuroria do të ketë afat 30-ditor për t’u përgjigjur, përpara se gjyqtarët të marrin një vendim. Deri atëherë, procesi mbetet i zvarritur dhe i ngarkuar me polemika për standardet e drejtësisë që po aplikohen në këtë rast të ndjeshëm politik dhe historik.
