Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata speciale në Hagë ka nënshkruar një marrëveshje me Mbretërinë e Belgjikës, përmes së cilës personat e dënuar nga kjo gjykatë do të mund të vuajnë dënimin me burg në territorin belg, pas hyrjes në fuqi të vendimeve përfundimtare. Marrëveshja u nënshkrua nga Administratorja e DHSK-së, Dr. Fidelma Donlon, dhe z. Zherar Div, Shef i Autoritetit Qendror për Bashkëpunim me Gjykatat Penale Ndërkombëtare në Ministrinë e Drejtësisë së Belgjikës. Kjo marrëveshje parasheh që zbatimi i dënimeve të bëhet në përputhje me kushtet e përcaktuara nga DHSK-ja dhe me miratimin e palës belge. Kryetarja Ekaterina Trendafilova, theksoi rëndësinë e kësaj marrëveshjeje si pjesë thelbësore e sistemit të drejtësisë penale ndërkombëtare. Ajo falënderoi Belgjikën për mbështetjen e saj të vazhdueshme dhe ftoi shtetet e tjera që të ndjekin këtë shembull, për të mundësuar zbatimin e plotë të mandatit të DHSK-së. Nga ana tjetër, përfaqësuesi belg, Zherar Div, konfirmoi përkushtimin e vendit të tij ndaj drejtësisë ndërkombëtare dhe funksionimit të Dhomave të Specializuara në përputhje me marrëveshjen mes BE-së dhe Kosovës, si dhe me Kushtetutën e Republikës së Kosovës, e cila në nenin 162 përcakton se dënimet e dhëna nga DHSK kryhen jashtë vendit. Aktualisht, DHSK ka dhënë dënime për dy persona:
- Salih Mustafa, i dënuar me 15 vjet burg
- Pjetër Shala, i dënuar me 18 vjet burg
Megjithatë, zbatimi i dënimeve në Belgjikë mund të bëhet vetëm pas hyrjes në fuqi të aktgjykimeve përfundimtare. Kjo marrëveshje përbën një hap të rëndësishëm në funksionalizimin e plotë të sistemit të dënimeve të DHSK-së, duke siguruar një proces të besueshëm, në përputhje me standardet ndërkombëtare të drejtësisë.
