Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Vendimi i fundit i ministrit Stoilkoviç për largimin nga puna të pesë punonjësve shqiptarë në Ministrinë për Marrëdhënie ndërmjet Bashkësive ka shkaktuar reagime të ashpra politike dhe ka ngritur shqetësime serioze për ligjshmërinë dhe paanshmërinë institucionale. Bashkimi Demokratik për Integrim ka vlerësuar se procesi është i mbushur me shkelje procedurale dhe mungesë të theksuar të provave, duke e cilësuar vendimin si arbitrar dhe të pajustifikuar. Sipas tyre, procedura disiplinore është zhvilluar jashtë afateve ligjore, pa përcaktim të qartë të përgjegjësisë individuale dhe me indikacione për justifikime të ndërtuara pas marrjes së vendimit. Po ashtu, theksohet se masa e ndërprerjes së marrëdhënies së punës është joproporcionale në raport me pretendimet, duke ngritur dyshime për një qasje selektive dhe potencialisht diskriminuese, veçanërisht duke pasur parasysh se të prekurit janë punonjës shqiptarë në një institucion që ka për mision bashkëjetesën ndëretnike. BDI kërkon transparencë të plotë për këtë rast, publikimin e dokumentacionit përkatës, hetim institucional dhe rishqyrtim të menjëhershëm të vendimeve në përputhje me ligjin. Sipas tyre, ky rast përbën një test serioz për funksionimin e shtetit ligjor dhe për besimin e qytetarëve në institucionet publike.
