Vlora Çitaku: Qasja e papërgjegjshme e Kurtit e ka çuar dialogun Kosovë–Serbi në “vdekje klinike”

Sekretarja e Përgjithshme e Partisë Demokratike të Kosovës, Vlora Çitaku, ka kritikuar ashpër kryeministrin Albin Kurti për mënyrën se si po menaxhon dialogun me Serbinë. Sipas saj, qasja e tij ka dobësuar përfshirjen e aleatëve ndërkombëtarë dhe ka ndikuar negativisht në perspektivën e këtij procesi jetik për të ardhmen e vendit. “Kurti, kur ka marrë detyrën si kryeministër, në tavolinën e tij ka gjetur letra të njëpasnjëshme të presidentëve amerikanë që i kërkonin institucioneve të Kosovës të përfshihen në dialog për arritjen e një marrëveshjeje finale gjithëpërfshirëse, me njohjen reciproke në qendër. Falë qasjes së papërgjegjshme të Kurtit, kemi humbur ambicien e aleatëve tanë për t’u përfshirë drejtpërdrejt në proces dhe mund të them se tani dialogu është në vdekje klinike,” ka deklaruar Çitaku  Ajo paralajmëroi se mungesa e seriozitetit dhe vizionit në këtë proces rrezikon perspektivën e Kosovës për arritjen e një marrëveshjeje përfundimtare me Serbinë, duke theksuar se “Kosova nuk mund të ecë përpara pa një partneritet të fuqishëm me miqtë ndërkombëtarë dhe pa një qasje të përgjegjshme në dialog.”