Zëvendëskryeministri Pacolli takon kryetarin e Dhomës së Deputetëve të Parlamentit të Çekisë, Radek Vondráček

Zëvendëskryeministri Pacolli, ka takuar sot gjatë ditës kryetarin e Dhomës së Deputetëve të Parlamentit të Çekisë, Radek Vondráček, në ditën e dytë të vizitës zyrtare. Në takim u bisedua për zgjerimin e bashkëpunimit ndërmjet Parlamenteve të dy vendeve dhe shkëmbimin e përvojave. Pacolli vlerësoi se Çekia mund të ndihmojë Kosovën në rrugën e saj të integrimeve evropiane dhe në përafrimin e legjislacionit të Republikës së Kosovës me BE-në. Gjatë takimit u bisedua hapur për bashkëpunimin e dy vendeve në fusha të ndryshme dhe për krijimin e një Grupi të Miqësisë ndërmjet Parlamentit të Republikës së Kosovës dhe të Çekisë. Ministri gjatë ditës ka vizituar edhe Senatin e Parlamentit çek, një prej institucioneve më mbështetëse të Kosovës. Aty është pritur nga nënpresidenti i Senatit, Jiří Růžička dhe anëtarët e delegacionit të tij ku u bisedua për zgjerimin e bashkëpunimit ndërmjet dy vendeve.