Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zyra e Rregullatorit për Energji, ka mbajtur mbledhjen e saj të dhjetë për këtë vit, në të cilën ka miratuar një numër të konsiderueshëm licencash dhe autorizimesh të reja për operatorë të ndryshëm në sektorin e energjisë elektrike. Sipas njoftimit, gjatë mbledhjes u miratuan tri licenca për furnizim dhe tregtim me energji elektrike dhe 76 autorizime për ndërtimin e gjeneratorëve për vetkonsum, një tregues i rritjes së interesimit për prodhimin e energjisë nga burime alternative. Drejtori i ZRrE-së, Ymer Fejzullahu, tha se institucioni po përballet me një valë të re kërkesash si pasojë e liberalizimit të tregut të energjisë, që po nxit investime të reja në këtë sektor strategjik. “Kemi kërkesa të mëdha për licencim për shkak të liberalizimit të tregut. Këto kërkesa nxisin investime më të mëdha në kapacitetet e energjisë,” deklaroi Fejzullahu. Në këtë mbledhje, bordi i ZRrE-së me katër vota për dhe asnjë kundër, miratoi licencimin e kompanisë “Swiss Solar” dhe “Solar Neo” për aktivitetin e furnizimit me energji elektrike, si dhe të kompanisë “Alfa Company” për tregtim me energji elektrike për një periudhë pesëvjeçare. Po ashtu, me katër vota për u miratua edhe rihapja e procedurës së tenderimit për zgjedhjen e Furnizuesit të Mundësisë së Fundit (FMF), si dhe autorizimi për subjektin “Eris Solar sh.p.k.” për zhvillim të aktiviteteve energjetike.
