Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot shënohen 26 vjet nga Masakra e Stagovës së Kaçanikut, një nga krimet më të rënda të kryera gjatë luftës në Kosovë. Më 21 maj 1999, forcat e regjimit serb të Sllobodan Millosheviqit vranë mizorisht 13 civilë shqiptarë, përfshirë edhe një fëmijë 7-vjeçar, Fitim Gudaqi. Të vrarët, të gjithë banorë të fshatit Stagovë, u masakruan pa mëshirë nga forcat paramilitare dhe policore serbe. Ndër viktimat e kësaj masakre janë: Hanife Jaha, Selvije Krivanjeva, Baki Bela, Hanife Gudaqi, Ramush Jaha, Ibush Rrushi, Ramadan Dashi, Fahri Mani, Bahrije Elezi, Sevdije Guri, Hamdi Dashi, Brahim Dashi, dhe dëshmori Ekrem Gudaqi, i cili ra duke mbrojtur civilët. Masakra e Stagovës konsiderohet ndër 15 masakrat më të tmerrshme të kryera gjatë luftës në Kosovë. Sipas hetimeve të Tribunalit Penal Ndërkombëtar për ish-Jugosllavinë, trupat e 10 viktimave iu nënshtruan autopsisë, duke konfirmuar aktin kriminal, por deri më sot askush nuk është dënuar për këtë krim. Përveç humbjes së jetëve, 21 maji 1999 solli shkatërrim masiv për fshatin. Më shumë se 50% e 180 shtëpive të Stagovës u dogjën dhe u rrënuan, ndërsa bagëtitë dhe pasuritë e banorëve u shkatërruan. Masakra dëshmon për qëllimin e qartë të regjimit serb për asgjësimin fizik dhe material të shqiptarëve, i përkufizuar si veprim me elemente të gjenocidit.
