Brickos

Strategjia e Teknologjisë Informative hapërim drejt ekonomisë digjitale

27/06/2016 Institucionet

Strategjia e Kosovës për Teknologji Informative adreson qartë orientimet dhe detyrimet për të gjitha palët në proces, në mënyrë që potenciali i Kosovës në ofrimin e shërbimeve të TI-së brenda dhe përtej kufijve të Kosovës të ndikojë në “Transformimin Digjital” të ekonomisë së vendit, u tha sot me rastin e lansimit të kësaj Strategjie.

Të pranishëm në lansimin Strategjisë së TI-së ishin kryeministri i vendit, Isa Mustafa, Ministri i Zhvillimit Ekonomik Blerand Stavileci, Ambasadori i Norvegjisë në Kosovë Jan Braathu,  Përfaqësuesja e Ambasadës Gjermane në Kosovë, Henriette Kötter, përfaqësues të institucioneve tjera të vendit dhe kompanive të sektorit të TIK-ut.

Kryeministri Isa Mustafa tha se potencialet e ekonomisë digjitale mund të kontribuojnë pa masë në rritjen ekonomike dhe sidomos në fushën e punësimit dhe janë instrumente të jashtëzakonshme për rritjen e ndërmarrjeve të vogla dhe të mesme dhe rrjedhimisht ne të ardhmen nuk mund të paramendohet relacioni konkurrues, relacioni i inovacioneve, standardizimi, shkathtësitë punuese, pa ekonomi digjitale.

Ai tha se Qeveria është e përkushtuar të krijojë të gjitha mundësitë që të aplikohet revolucioni digjital, duke inkurajuar transformimin digjital të bizneseve ekzistuese dhe përkrahjen e më shumë bizneseve digjitale në vend.

Ndërsa, Ministri Blerand Stavileci theksoi se Strategjia i hap rrugë jo vetëm zhvillimit të sektorit të komunikimeve elektronike, por i vë bazat e forta dhe solide për një ekonomi të bazuar në dije, për një ekonomi e cila sot hapëron drejt ekonomisë digjitale.

“Strategjia e Kosovës për Teknologji Informative mbështetet në 9 shtylla dhe orientimi kryesor është që ne ta zhvillojmë tregun e brendshëm, po ashtu tregun e jashtëm sidomos për kompani, të cilat eksportojnë shërbime e po ashtu edhe fushën e inovacionit dhe të kërkimeve dhe hulumtimeve të aplikueshme”, tha ai.

Sipas tij, MZHE përveç fushave që mbulon, i ka kushtuar vëmendje të veçantë TI-së, madje disa prej objektivave i ka tejkaluar në kuptimin e zgjerimi e projekteve të rëndësishme, duke parë që ky sektor po hapëron sigurt drejt të ardhmes.

Ministri Stavileci potencoi edhe projektin ‘Ekonomia digjitale e Kosovës” që realizohet së bashku me Bankën Botërore, i cili ka 3 shtylla kryesore; infrastrukturën digjitale, edukimin digjital dhe bizneset digjitale, ndërsa shtoi se partnerë të ndryshëm kanë premtuar mbështetje për krijimin e Fondit për TIK.

Nga ana e tij, Ambasadori i Norvegjisë, Jan Braathu, ka përgëzuar Qeverinë e Kosovës për hartimin e kësaj Strategjie, duke e vlerësuar atë si një e arritur e madhe, që vjen si rezultat i bashkëpunimit të Qeverisë me sektorin e IT-së. Ai tha se STIKK është shembull shumë i mirë, jo vetëm për Ballkanin Perëndimor por për Evropën Juglindore. Ky ka qenë partneritet i mirë mes Qeverisë së Kosovës dhe sektorit të TI-së.

Përfaqësuesja e Ambasadës Gjermane në Kosovë, Henr iette Kotter, tha se e kanë mbështetur këtë projekt duke besuar se sektori i IT-ve në Kosovë ka një potencial të madh të zgjerimit, mund të kontribuojë në rritjen e konkurrencës së Kosovës në tregun ndërkombëtar, për të promovuar zhvillimin ekonomik dhe krijimin e vendeve të reja të punës.

Ndërkaq, aspekte të Strategjisë së Kosovës për Teknologji Informative kanë prezantuar, Zëvendësministrja e Zhvillimit Ekonomik, Besa Zogaj-Gashi dhe

Lucas von Zallinger, Konsulent për GIZ.

Ndryshe, hartimi i kësaj strategjie është bërë në bashkëpunim me sektorin privat nëpërmjet STIKK (Shoqata për Teknologji Informative dhe Komunikuese e Kosovës), Universitetet dhe Ministritë tjera që kanë të bëjnë me TI, si dhe me mbështetjen e çmuar nga GIZ-i dhe Ambasada Norvegjeze.

Kontrolloni gjithashtu

Fillojnë vizitat sistematike të nxënësve të klasave të para dhe pesta të shkollave të komunës së Rahovecit 

Fillojnë vizitat sistematike të nxënësve të klasave të para dhe pesta të shkollave të komunës …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara