Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri në detyrë i Kosovës, Albin Kurti, ka deklaruar se dallimet e tij me kryeministrin e Shqipërisë, Edi Rama, si dhe me partnerët ndërkombëtarë, lidhen kryesisht me qasjen ndaj Serbisë. Këto komente ai i bëri gjatë një bashkëbisedimi me komunitetin shqiptar në Federatën Pan-Shqiptare “VATRA” në New York, në fund të shtatorit, përmes një videoje të publikuar së fundmi nga Bashkim Berisha. Sipas Kurtit, qëndrimet e ndryshme shfaqen sidomos në raport me politikën ndaj Beogradit zyrtar. “Unë kam dallime me kryeministrin Rama, kam dallime jo rrallë edhe me partnerët tanë. Në përgjithësi, këto dallime kanë të bëjnë për qëndrimin karshi Beogradit zyrtar. Qaty po dallojmë,” u shpreh Kurti. Ai tha se mundohet “t’i informojë, t’i formojë dhe t’i edukojë” aleatët me të gjitha mundësitë e tij, por pranoi se ato janë të kufizuara. Kurti nënvizoi se pavarësisht këtyre dallimeve, marrëdhëniet me Tiranën zyrtare dhe aleatët euro-amerikanë mbeten pozitive dhe funksionale. “Ne s’bëjmë asgjë nga mllefi e për inat, por për hir të sundimit të ligjit dhe të drejtave të njeriut,” tha ai, duke shtuar se mospajtimet nuk përbëjnë pengesë për të ecur përpara. Në këtë kontekst, ai përmendi edhe nismën “Ballkani i Hapur”, duke theksuar se mosdakordësia e Kosovës nuk nënkupton përplasje të thellë me partnerët ndërkombëtarë, por se proceset politike “po kërkojnë kohë”.
