Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Përvoja e diskutueshme e zgjedhjeve të 9 shkurtit 2025, kur faqja e KQZ-së nuk funksiononte dhe rezultatet paraprake e nxirrnin Lëvizjen Vetëvendosje me mbi 50 për qind të votave, ka ngritur shqetësime serioze te partnerët ndërkombëtarë. Sipas vlerësimeve, një situatë e tillë nuk pritet të tolerohet më. Ambasadori i Britanisë së Madhe në Kosovë, Jonathan Hargreaves, i ka adresuar kërkesa të drejtpërdrejta kryeministrit në detyrë, Albin Kurti, duke kërkuar zgjedhje të qeta, funksionale dhe krijim të shpejtë të institucioneve të reja pas bllokadës së gjatë institucionale. Në njoftimin e tij, Hargreaves theksoi rëndësinë e stabilitetit zgjedhor dhe funksionalitetit institucional. “Diskutuam fushatën zgjedhore dhe shpresat për një proces të qetë që mundëson krijimin e shpejtë të institucioneve”, deklaroi ai. Ambasadori britanik nënvizoi se institucionet e reja janë të domosdoshme për përballjen me sfida urgjente, përfshirë buxhetin e shtetit, dialogun me Serbinë dhe integrimin evropian. Ai shprehu gjithashtu pritshmëri për thellimin e bashkëpunimit Britani–Kosovë me qeverinë e ardhshme. Angazhimi i shtuar i Britanisë në mbështetje të demokracisë dhe modernizimin e procesit zgjedhor, përfshirë rregullimin e faqes së KQZ-së, interpretohet si sinjal i qartë pakënaqësie me menaxhimin aktual të proceseve demokratike dhe paralajmërim se standardet zgjedhore nuk do të tolerohen më.
