Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadorja e Gjermanisë në Beograd, Anke Konrad, zhvilloi sot një vizitë në Luginën e Preshevës për t’u njohur nga afër me zhvillimet dhe të drejtat e shqiptarëve në këtë rajon. Ajo u prit nga përfaqësues të Këshillit Kombëtar Shqiptar në Bujanoc. Sipas kryetarit të Këshillit, Enkel Rexhepi, gjatë takimit u diskutua për sfidat aktuale të komunitetit shqiptar, përfshirë mungesën e teksteve shkollore në gjuhën shqipe, mosnjohjen e diplomave nga Kosova, si edhe çështje që lidhen me përfaqësimin institucional dhe të drejtat qytetare. Palët adresuan gjithashtu procesin e pasivizimit të adresave, si dhe shqetësimet për ndarjen e pabarabartë të fondeve për kulturë dhe media në gjuhën shqipe. Në takim u theksua rëndësia e zbatimit të Planit me 7 Pikë, i konsideruar dokument bazë për avancimin e të drejtave të shqiptarëve në Luginë. Këshilli Kombëtar Shqiptar vlerësoi mbështetjen e Gjermanisë dhe të partnerëve ndërkombëtarë, ndërsa potencoi nevojën për zbatim të marrëveshjeve dhe shmangie të praktikave diskriminuese. Në përmbyllje, përfaqësuesit e Këshillit shprehën angazhimin për të vazhduar rolin e tyre si zë institucional i shqiptarëve të Luginës së Preshevës dhe për forcimin e bashkëpunimit me faktorin ndërkombëtar.
