Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kundër koncept dokumentit të Ministrisë së Punëve të Brendshme në lidhje me Parandalimin dhe Luftimin e Krimeve Kibernetike, ka reaguar, kush tjetër pos një Asociacion, i cili thirret në emër të medieve e gazetarëve të Kosovës, edhe pse shumica dërrmuese e medieve as e njohin si të tillë, as kanë nënshkruar të jenë pjesë e tij. Ky farë asociacioni pjellë e një asociacioni të të ashtuquajturve gazetarë “profesionistë” konsideron se kjo formë e përfshirjes së raportimit mediatik ne kuadër të Ligjit Kundër Krimeve Kibernetike është e gabuar. Çfarëdo përpjekje për ta kriminalizuar shpifjen konsiderohet tentativë për kufizim të lirisë së informimit, Asociacioni i Gazetarëve të Kosovës e kupton se kjo dukuri është shqetësuese mirëpo dëshiron t’ju bëjë me dije sponzoruesve dhe institucioneve përkatëse se liria e medieve, sipas tyre është e pafre dhe ajo nuk i jep përgjegjësi askujt.
Po ta kishte përnjëmend Ministria ta jetësonte këtë dokument, një pjesë e madhe e gazetarëve që jetojnë duke kurdisur gënjeshtra, duke shpifur e duke deformuar lajmet do të mbeteshin pa bukën e gojës. Por Ministria as e ka përnjëmend, as mund të bëjë gjë përveç fjalëve koti, sepse janë pikërisht magnatët e medieve, të lidhur ngushtë me botën e krimit kibernetik, me bosët e tjerë të krimit të cilët edhe i blejnë ministrat, i korruptojnë dhe nuk lejojnë që ligji të vendoset mbi gjuhën e gënjeshtrës, mbi shpifjen e sharjen antinjerëzoren, sepse kjo është gjella e preferuar e shumë medieve të vendit. Disa herë në Kosovë janë bërë përpjekje për ta ndalur plasimin e lajmeve të rreme, por të gjitha nismat kanë shkuar kot. Si mund të ekzistojnë jugo-mediet nëse u ndalohet gënjeshtra, shpifja, sharja, fyerja?
