Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Agjencia ndërkombëtare e lajmeve Associated Press i ka kushtuar një artikull të veçantë dëshmisë së ish-diplomatit amerikan, James Rubin, i cili po paraqitet në Gjykatën Speciale si dëshmitar i parë i mbrojtjes së ish-presidentit Hashim Thaçi. AP rikujton se Thaçi dhe tre ish-udhëheqës të Ushtrisë Çlirimtare të Kosovës – Kadri Veseli, Rexhep Selimi dhe Jakup Krasniqi – po gjykohen në Hagë për akuza që përfshijnë vrasje, persekutim, tortura dhe zhdukje me forcë. “Ata vlerësohen gjerësisht si heronj kombëtarë në atdheun e tyre”, thekson raportimi. Duke iu referuar dëshmisë së Rubin, AP citon se ai e përshkroi Thaçin gjatë luftës si “përfaqësues” të UÇK-së, pa autoritet real. “Për mua ishte e qartë se ai nuk ishte përgjegjës. Ai nuk i kishte njohuritë, kapacitetet ose autoritetin për të marrë vendime në çfarëdo forme ose mënyre”, ka thënë Rubin para trupit gjykues. Në artikull kujtohet gjithashtu se Rubin ka qenë pjesë e ekipit të ish-sekretares së Shtetit, Madeleine Albright, në bisedimet e Rambujesë më 1999, si dhe në procesin e mëvonshëm për çarmatosjen e UÇK-së. AP thekson se Thaçi, i cili pas luftës u ngjit në pushtet dhe u zgjodh president i Kosovës, dha dorëheqje në vitin 2020 për t’u përballur me akuzat në Gjykatën Speciale.
