Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish deputeti i LDK-së, Avdullah Hoti, ka kritikuar vendimin për mbajtjen e zgjedhjeve më 28 dhjetor, duke e konsideruar të pazakonshme organizimin e procesit zgjedhor në periudhën e fundvitit, kur një pjesë e madhe e qytetarëve ndodhen jashtë vendit për pushime. Hoti theksoi se pavarësisht kohës, këto zgjedhje janë thelbësore për rikthimin e normalitetit institucional dhe largimin e, siç e quajti ai, qeverisjes së dëmshme të Albin Kurtit. “Viti 2025 duhet të jetë vit i rikuperimit të marrëdhënieve me aleatët tanë, i rivendosjes së qeverisjes normale, i përmbylljes së projekteve të mëdha infrastrukturore dhe i nisjes së investimeve të reja në energjetikë. Duhet të miratojmë marrëveshjet ndërkombëtare të bllokuara me vite, të kthehemi te marrëveshja e Washingtonit dhe të heqim sanksionet e Bashkimit Evropian,” deklaroi Hoti. Ai shtoi se Kosova ka nevojë për një orientim të ri të politikës së jashtme e të sigurisë. Sipas tij, që nga viti 2026 duhet të rifillojnë mbledhjet e përbashkëta me Shqipërinë, të intensifikohet dialogu me Bashkimin Evropian për integrim të plotë dhe të punohet ngushtë me partnerët strategjikë në mënyrë që Kosova të ecë drejt anëtarësimit në NATO.
