Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Bashkimi Evropian ka reaguar me zhgënjim ndaj procesit të certifikimit të partive politike për zgjedhjet lokale në Kosovë, duke kritikuar vendimin për moscertifikimin e dy subjekteve politike serbe dhe qëndrimin e mbajtur nga Lëvizja Vetëvendosje në këtë proces. Në një deklaratë të zëdhënësit të BE-së, thuhet: “BE-ja shpreh zhgënjim për moscertifikimin e dy partive politike serbe të Kosovës. Ne shprehim keqardhje për qëndrimin e marrë nga Vetëvendosje gjatë procesit të certifikimit.” Deklarata thekson se zgjedhjet duhet të jenë të lira, të drejta dhe gjithëpërfshirëse, dhe se përjashtimi i aktorëve politikë cenon parimin demokratik të përfaqësimit të të gjitha komuniteteve në procesin zgjedhor. “Partitë që përmbushin kriteret ligjore duhet të lejohen të marrin pjesë në zgjedhje dhe përfaqësuesit e tyre të zgjedhur të ushtrojnë funksionin në gjithë territorin e Kosovës,” – thuhet më tej në reagim. BE u ka bërë thirrje institucioneve kosovare që të garantojnë që i gjithë procesi – përfshirë edhe trajtimin e ankesave – të zhvillohet në përputhje me Kushtetutën, Ligjin për Zgjedhjet e Përgjithshme dhe parimet e sundimit të ligjit.
