Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i NISMA-s Socialdemokrate, Fatmir Limaj, ka refuzuar kategorikisht të hyjë në diskutime për ndarje pushteti apo poste ministrore, duke u përqendruar tërësisht në kërkesën për të udhëhequr Kuvendin e Kosovës.
Këtë qëndrim e bëri publik Sekretari i Përgjithshëm i NISMA-s, Bilall Sherifi, gjatë një interviste në RTV Dukagjini, ku sqaroi se prioriteti i vetëm i partisë dhe i Limajt ka qenë pozita e kryetarit të Kuvendit, jo pjesëmarrja në ekzekutiv.
“Z. Limaj ka qenë i qartë – nuk ka pranuar të diskutojë fare për poste ministrore. Qëndrimi ynë ka qenë i prerë: kemi kërkuar partneritet në Kuvend, jo në Qeveri”, tha Sherifi.
Ai theksoi se zgjedhja e kryetarit të Kuvendit është kompetencë e mazhorancës, megjithatë kujtoi se partia më e madhe nuk mund ta zgjedhë atë pa mbështetjen e duhur numerike.
“Mandati për kryetar Kuvendi i takon mazhorancës, por partia më e madhe nuk mund ta zgjedhë pa numrat. Kjo është vërtetuar edhe në praktikë”, shtoi ai.
Sherifi po ashtu zbuloi se ka pasur diskutime të përgjithshme me Lëvizjen Vetëvendosje për mundësinë e një bashkëpunimi, por ato nuk kanë hyrë kurrë në detaje për ndonjë ministri të mundshme.
“Ka pasur një ofertë të mirë në aspektin e diskutimeve të përgjithshme, por nuk është folur asnjëherë për emra ministrash apo ndarje portofolësh”, sqaroi ai.
Duke folur për figurën e Limajt, Sherifi tha se ai është një ndër deputetët më të denjë për të udhëhequr Kuvendin, por kjo është e realizueshme vetëm në kuadër të një shumice parlamentare.
“Fatmir Limaj meriton të jetë kryetar Kuvendi, por kjo është e mundur vetëm nëse je pjesë e mazhorancës. Pa shumicë nuk zgjidhesh as kryeministër, as kryetar Kuvendi”, përfundoi ai.
