Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Daut Haradinaj ka lëshuar kritika të ashpra në drejtim të kryeministrit Albin Kurti, duke e akuzuar për, siç e quan ai, “shkatërrim të planifikuar të Kosovës”. Në një reagim publik, Haradinaj thotë se qeveria aktuale ka dëmtuar rëndë sektorin e energjisë duke anuluar në javën e parë të mandatit të saj projektin për ndërtimin e termocentralit të ri, që sipas planit pritej të përfundonte në periudhën 2023-2024, me kosto të planifikuar prej 82 euro për megavat. Ai thekson se sot operatorët po paguajnë nga 198 deri në 220 euro për megavat, gjë që i kushton vendit rreth 360 milionë euro në vit, një barrë që bie mbi qytetarët. Haradinaj e quan këtë situatë si një “rritje astronomike mafioze” dhe ngre alarmin se energjia tashmë është bërë pjesë e sigurisë globale, duke aluduar për lidhje të errëta në blerjen e energjisë përmes “lidhjeve të shkurtra të Kurtit”. Ai gjithashtu kritikon qeverinë për, sipas tij, mungesën e vullnetit për ta shkëputur Kosovën nga sistemi energjetik serb, duke akuzuar për një “krim të organizuar shqiptaro-serb” ku përfitues është Beogradi, ndërsa populli i Kosovës e paguan faturën. Ai u bën thirrje qytetarëve që të mos heshtin, por të reagojnë para se të jetë vonë.
