Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mjeku i luftës dhe veprimtari i çështjes kombëtare, Dr. Jakup Ismajli, ka reaguar me tone të ashpra ndaj deklaratave të zëvendëskryeministrit të Maqedonisë së Veriut, Arben Fetai, të bëra gjatë një interviste në një televizion kosovar. Në një reagim publik, Ismajli shprehet i befasuar dhe i shqetësuar nga mënyra se si Fetai e ka përdorur hapësirën mediatike në Kosovë për të sulmuar liderin shqiptar Ali Ahmeti, në vend se të fliste për sukseset e qeverisë së tij. “Ta quash Ali Ahmetin ‘antikosovar’ në një medium të Kosovës është përpjekje për të devijuar vëmendjen nga problemet reale të shqiptarëve në Maqedoni”, thotë Ismajli. Ai shton se deklarata të tilla nuk sjellin asnjë të mirë për shqiptarët dhe se veprimi i Fetait është përpjekje për propagandë politike pa vlerë konkrete. Në reagimin e tij, Ismajli ka shtruar pyetje të drejtpërdrejta, duke kërkuar nga Fetai që të tregojë arritjet reale të qeverisë aktuale për shqiptarët në Maqedoninë e Veriut. Ai vë në pikëpyetje qëndrimin e Fetait ndaj liderëve maqedonas si Mickoski, dhe nënvizon se largimi i Arben Taravarit nga kjo qeveri flet vetë për zhgënjimin e thellë të përjetuar. Duke aluduar në mundësinë e kthimit të politikave diskriminuese ndaj shqiptarëve, Ismajli e mbyll reagimin me një pyetje retorike: “Nëse rikthehen tendenca për ta kthyer gjendjen e shqiptarëve para vitit 2001, në cilën anë do të rreshtohet z. Arben Fetai?” Dr. Ismajli, një zë i respektuar nga periudha e luftës dhe pasluftës, e përmbyll mesazhin me thirrje për reflektim dhe përgjegjësi politike ndaj shqiptarëve që përfaqësohen në Maqedoninë e Veriut.
