Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Shqipërisë, Edi Rama, njëkohësisht kryetar i Partisë Socialiste, ka propozuar një ndryshim të rëndësishëm për Kuvendin e Shqipërisë, duke sugjeruar uljen e numrit të deputetëve nga 140 në 101. Propozimi u bë gjatë fjalës së tij në Asamblenë Kombëtare të PS-së, ku Rama theksoi se pas më shumë se tri dekadash, vendi ka nevojë për një cikël të ri reformash dhe riorganizimi të institucioneve, përfshirë Kuvendin. “Tepria e numrit të deputetëve është evidente. Zbritja e numrit të deputetëve të Kuvendit në të paktën 101, edhe më pak po të ketë bujrum, do të kishte vetëm impakt pozitiv. Ky ndryshim duhet të jetë objektiv i yni, sepse përkon edhe me vullnetin e zgjedhësve tanë”, tha Rama. Në të njëjtën mbledhje, kryeministri njoftoi edhe zhvillimin e zgjedhjeve të parakohshme për Bashkinë e Tiranës. Ai kritikoi ashpër sistemin e drejtësisë, duke theksuar se çdo ndryshim ligjor në këtë fushë nuk do të bëhet pa miratimin e Komisionit Europian. “Ne kemi sot një kryetar bashkie të zgjedhur tre herë, të dënuar jo për detyrën si kryetar. I janë publikuar madje edhe biseda familjare nga burgu, gjë që nuk ndodh në asnjë vend demokratik. Kjo është shkelja më flagrante e ligjit nga ata që duhet të mbajnë nën kontroll hetimet”, deklaroi Rama. Duke folur për drejtimin e ardhshëm të Tiranës, ai falënderoi kryetaren e përkohshme për angazhimin e saj, por shtoi se kryeqyteti ka nevojë për një vizion të ri. “Mendoj se Ogerta Manastirliu është njeriu i duhur për drejtimin e Bashkisë së Tiranës”, tha Rama.
