Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-kryetari i Gjykatës Kushtetuese të Kosovës, Enver Hasani, ka deklaruar se i takon klasës politike që, brenda kornizave kushtetuese dhe ligjore, të gjejë një rrugë për tejkalimin e krizës institucionale. Në një intervistë për Radion Evropa e Lirë, Hasani tha se ekziston mundësia reale që Kuvendi të mos arrijë të konstituohet brenda afatit 30-ditor, çka do ta vinte sërish në lëvizje Gjykatën Kushtetuese. Sipas tij, aktgjykimi i fundit i Kushtetueses është i qartë, por sjelljet e Lëvizjes Vetëvendosje tregojnë se afati i vendosur nuk do të respektohet. “Nëse gjykojmë sjelljet e zotit Kurti, gjendja po shkon drejt mos konstituimit të Kuvendit të Kosovës. Ai po zbaton aktgjykimin e fundit të Gjykatës Kushtetuese me qëllim të pengimit të konstituimit ose inaugurimit të Kuvendit”, tha Hasani. Profesori i së Drejtës dhe Marrëdhënieve Ndërkombëtare në Universitetin e Prishtinës theksoi se një mangësi e aktgjykimit të Kushtetueses është mungesa e sanksioneve të qarta për moszbatim. Si mundësi ai përmendi de certifikimin e kryesuesit të seancës konstituive, Avni Dehari, ose eliminimin e shkelësve nga procesi i konstituimit. “Aty ku identifikohen rastet e shkelësve të vendimeve të Kushtetueses, ata duhet të eliminohen nga pozitat drejtuese, në këtë rast, në procesin e konstituimit”, u shpreh Hasani. Sipas vendimit, kryetari i Kuvendit duhet të zgjidhet me votim të hapur, ndërsa një kandidat mund të hidhet në votim deri në tri herë.
