Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti nga Instituti Demokratik i Kosovës, Eugen Cakolli, ka paralajmëruar se dështimi për zgjedhjen e presidentit brenda afatit kushtetues deri më 5 mars mund ta fusë vendin në një krizë të re politike dhe ta çojë drejt zgjedhjeve të parakohshme, duke theksuar se afatet kushtetuese nuk mund të varen nga vullneti politik. Përmes një reagimi publik, Cakolli ka thënë se Kosova po hyn në ditët e fundit të afatit kushtetues për zgjedhjen e presidentit, ndërsa debati politik, sipas tij, po fokusohet më shumë tek fajësimi eventual për zgjedhje të reja sesa tek gjetja e një zgjidhjeje që siguron stabilitet institucional. Ai ka kritikuar edhe idetë që krizat politike t’i delegohen Gjykata Kushtetuese e Kosovës, duke theksuar se kjo gjykatë nuk është mekanizëm për zgjidhje politike, por garantuese e rendit kushtetues. Sipas tij, mënyra se si Kushtetuta e ka ndërtuar procesin e zgjedhjes së presidentit tregon qartë se posti është menduar të ketë mbështetje të gjerë politike dhe jo vetëm shumicë të thjeshtë parlamentare. Kërkesa për votat e dy të tretave në raundet e para, si dhe procedurat e nominimit, synojnë pikërisht ndërtimin e konsensusit politik para votimit. Cakolli thekson se kalimi i afatit kushtetues më 5 mars përbën mospërmbushje të një obligimi kushtetues dhe një situatë e tillë, në praktikë, mund të zgjidhet vetëm përmes zgjedhjeve të reja parlamentare.
