Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-deputetja e PDK-së, Ganimete Musliu, ka akuzuar ashpër Qeverinë e Kosovës për mungesë transparence lidhur me Fondin e Sigurisë, një fond i hapur para tre vitesh për të mbështetur kapacitetet mbrojtëse të vendit, por i cili – sipas saj – vazhdon të mbetet i paqartë, i pamonitoruar dhe i pasqaruar publikisht. Musliu tha se qytetarët dhe diaspora kanë kontribuar me mijëra euro, ndërsa Qeveria Kurti “hesht, shmang përgjigjet dhe e shpall gjithçka sekret” sa herë që kërkohet llogaridhënie. Ajo ngriti një varg pyetjesh për të cilat pretendon se institucionet nuk kanë dhënë asnjë përgjigje zyrtare:
– Sa para janë mbledhur realisht?
– Ku kanë përfunduar mjetet?
– Për çfarë janë shpenzuar?
– A janë investuar në pajisje, infrastrukturë apo mbrojtje civile?
– Pse nuk ka raportim publik?
Musliu theksoi se menaxhimi i fondit po krijon dyshime serioze në opinion, duke shtuar se fondi është para publike dhe nuk mund të trajtohet si “pasuri private”. Sipas saj, fshehtësia e vazhdueshme rreth Fondit të Sigurisë “nuk është rastësi, por zgjedhje e qartë politike”, duke akuzuar Qeverinë për shmangie të qëllimshme nga transparenca dhe llogaridhënia publike.
