Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Speciale në Hagë ka hedhur poshtë ankesën e ish-pjesëtarit të UÇK-së, Salih Mustafa, i cili pretendonte se dënimi me 15 vjet burg për krime lufte bie ndesh me Kushtetutën e Kosovës dhe Konventën Evropiane për të Drejtat e Njeriut. Mustafa kishte kërkuar që vendimi i Apelit për dënim me 15 vjet burg të shpallej jokushtetues, duke e konsideruar atë joproporcional dhe arbitrar. Sipas tij, ishte shkelur neni 33 (3) i Kushtetutës së Kosovës që ndalon dënimet joproporcionale me veprën penale. Por Kushtetuesja vlerësoi se Mustafa nuk arriti të dëshmojë se është shkelur ndonjë e drejtë themelore, duke e cilësuar ankesën e tij si të papranueshme. Në vendim thuhet se proporcionaliteti i dënimit nuk është shkelur në mënyrë flagrante dhe nuk ka baza për ta konsideruar vendimin si arbitrar. Gjykata rikujtoi se standardi i joproporcionalitetit ekstrem, si ai që ndalohet nga neni 3 i Konventës Evropiane, nuk është përmbushur në këtë rast. Ndërkaq, ajo theksoi se parimi i proporcionalitetit ligjor duhet të interpretohet në mënyrë sistematike, në përputhje me normat kombëtare dhe ndërkombëtare për të drejtat e njeriut. Mustafa, i njohur me nofkën “Cali”, është dënuar për krime lufte në lidhje me ngjarjet në një vendndalim të UÇK-së në Zllash të Prishtinës, ku viktimat u mbajtën dhe u keqtrajtuan. Fillimisht ishte dënuar me 26 vite burg, më pas Apeli ia uli dënimin në 22 vite, e pas rikthimit të çështjes nga Supreme, përfundimisht u dënua me 15 vite. Me vendimin e fundit të Kushtetueses, janë ezauruar të gjitha mjetet juridike në kuadër të sistemit të Dhomave të Specializuara për Salih Mustafën.
