Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-analisti i CIA-s për Ballkanin, David B. Kanin, ka deklaruar se vendimi i Shteteve të Bashkuara për të pezulluar dialogun strategjik me Kosovën është një sinjal i qartë i humbjes së besimit në kryeministrin në detyrë, Albin Kurti. Sipas Kanin, ky veprim i Washingtonit nënkupton se SHBA-të nuk duan më të bashkëpunojnë me Kurtin dhe se zgjidhja e vetme e parë nga amerikanët janë zgjedhjet e reja parlamentare në Kosovë. “Kjo bën një dallim të madh për Kosovën. Shtetet e Bashkuara po sinjalizojnë se nuk duan të bashkëpunojnë me Albin Kurtin. Kjo është e qartë. Ata duan zgjedhje”, tha Kanin. Ai shtoi se dështimet e politikës së jashtme të presidentit amerikan Donald Trump në Ukrainë dhe Gaza kanë rritur presionin mbi administratën amerikane për të mos lejuar një tjetër krizë në Ballkan, duke e parë dialogun Kosovë–Serbi si prioritet strategjik. “Kryeministri Kurti për vite me radhë ka bërë të qartë se nuk e pranon dialogun ekzistues me Serbinë, sidomos Asociacionin e Komunave me Shumicë Serbe. Por kjo sjellje ka lodhur SHBA-të, të cilat nuk duan më të përballen me refuzime e retorikë, por kërkojnë rezultate konkrete”, theksoi Kanin. Megjithatë, ai ngriti edhe pyetjen se çfarë do të ndodhë pas zgjedhjeve të mundshme të parakohshme, duke pasur parasysh se një pjesë e madhe e liderëve opozitarë janë aktualisht në procese gjyqësore në Hagë. “Edhe nëse Kurti humb, kush do të jetë kryeministri i ardhshëm? Kjo mbetet e paqartë”, u shpreh ai.
