Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
James Rubin, ish-ndihmës sekretar amerikan i Shtetit gjatë luftës në Kosovë, ka zbuluar në dëshminë e tij në Hagë se agjencitë amerikane të zbulimit kanë pasur marrëdhënie të hershme me Ushtrinë Çlirimtare të Kosovës, veçanërisht me komandantin e zonës së Dukagjinit, Ramush Haradinajn. Rubin deklaroi se CIA kishte vite që mbante kontakte me Haradinajn dhe drejtues të tjerë të UÇK-së, duke i udhëzuar ata që të mos përfshiheshin në akte terroriste, krime lufte apo elementë të fundamentalizmit islamik. “Unë besoj se atyre u është thënë të mos angazhoheshin në veprimtari terroriste, të mos kryenin krime lufte, dhe sigurisht, të mos e promovonin fundamentalizmin islamik. Kjo ka qenë politika jonë kryesore asaj kohe”, tha Rubin. Ai shtoi se për këto lidhje kishte mësuar personalisht gjatë vitit 1999, kur vizitoi Kosovën dhe u takua me shefin e CIA-s dhe punonjësit e saj në terren. “Mësova se marrëdhëniet e tyre me Haradinajn kishin nisur prej vitesh, të paktën që nga 1998-a”, theksoi ai. Rubin kujtoi gjithashtu se ambasadori amerikan Robert Gelbard kishte pasur takime të drejtpërdrejta me përfaqësues të UÇK-së para se NATO të niste ndërhyrjen ushtarake në Kosovë.
