Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Protesta e 17 tetorit në sheshin “Skënderbej” të Tiranës, ku mijëra qytetarë, veteranë të Ushtrisë Çlirimtare të Kosovës dhe mbështetës nga të gjitha trevat shqiptare u mblodhën për të kërkuar drejtësi për ish-krerët e UÇK-së, ka marrë jehonë të gjerë në mediat ndërkombëtare. Mediat prestigjioze si Associated Press, The Washington Post, The Telegraph dhe Anadolu Agency raportuan për protestën, duke theksuar se demonstruesit e konsiderojnë procesin në Hagë “të padrejtë dhe politikisht të motivuar”. Associated Press shkruan: “Mijëra njerëz protestojnë në kryeqytetin e Shqipërisë kundër gjykatës së mbështetur nga BE që ndjek penalisht veteranët e luftës së Kosovës.” Protesta, e zhvilluar në mënyrë paqësore, shënoi një mobilizim të rrallë mbarëkombëtar, me pjesëmarrës nga Shqipëria, Kosova, Maqedonia e Veriut e diaspora. Himni kombëtar, pankartat “Liria ka emër” dhe simbolet e UÇK-së e shndërruan sheshin në një skenë të bashkimit dhe kujtesës kombëtare. Në thelb të kërkesave të protestuesve ishte lirimi i ish-presidentit Hashim Thaçi, Kadri Veselit, Jakup Krasniqit dhe Rexhep Selimit, të cilët po gjykohen në Hagë që nga viti 2020 për krime lufte – akuzë që ata dhe mbështetësit e tyre e cilësojnë të padrejtë. Procesi gjyqësor, i nisur në vitin 2023, është tashmë drejt përfundimit. Muajin e kaluar, mbrojtja e Thaçit thirri dëshmitarë ndërkombëtarë, përfshirë ish-ndihmësin e sekretarit amerikan të Shtetit, James Rubin, dhe ish-diplomatin britanik John Stewart Duncan, të cilët deklaruan se Thaçi nuk kishte autoritet komandues mbi UÇK-në. Protesta e Tiranës, pas asaj të gushtit në Prishtinë dhe shtatorit në Hagë, po vlerësohet si shprehja më e fuqishme e unitetit shqiptar në mbrojtje të UÇK-së dhe e një zëri të përbashkët kundër padrejtësisë.
