Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Instituti prestigjioz “Instituti për Paqe dhe Ekonomi” ka publikuar më 19 qershor Indeksin Global të Paqes për vitin 2025, ku përfshihet edhe Kosova. Sipas këtij raporti, Kosova ka shënuar një përkeqësim me tre pozita krahasuar me vitin e kaluar, duke rënë nga vendi i 56-të në të 63-in, në mesin e 163 shteteve të përfshira në këtë indeks. Indeksi mat gjendjen e paqes në tri fusha kryesore: sigurinë shoqërore dhe të brendshme, konfliktet e vazhdueshme brenda dhe jashtë vendit, si dhe nivelin e militarizimit. Në këto kategori, Kosova është poentuar me 2.144 pikë në sigurinë sociale dhe të brendshme, 1.805 pikë në konfliktet e vazhdueshme, dhe 1.67 pikë në militarizim – një reflektim i një paqeje të qëndrueshme, por të brishtë. Kosova renditet përkrah shteteve si Serbia, Moldavia, Qipro, Jordania dhe Franca, ndërsa në rajon, Serbia gjithashtu ka pësuar një rënie me një pozitë dhe renditet menjëherë pas Kosovës në vendin e 64-të. Megjithatë, në një tjetër raport të së njëjtës organizatë që mat ndikimin e terrorizmit, Kosova ka shënuar përmirësim të dukshëm, duke u ngritur për 13 pozita dhe duke u renditur ndër vendet më së paku të ndikuara nga terrorizmi. Ky raport përbën një thirrje për reflektim dhe veprim nga institucionet përgjegjëse në Kosovë, për të avancuar më tej drejt ndërtimit të një shoqërie më paqësore dhe të qëndrueshme.
