Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kanë kaluar pesë ditë qëkur Gjykata Kushtetuese doli me njoftimin për seancën konstituive të Kuvendit, duke konstatuar se ajo ende nuk është përmbyllur, pasi mungon zgjedhja e nënkryetarit nga komuniteti serb. Megjithatë, vendimi ende nuk ka hyrë në fuqi, pasi duhet të publikohet në Gazetën Zyrtare. Kjo vonesë po zgjat bllokadën institucionale, duke e lënë Kosovën pa Kuvend funksional dhe me një qeveri në detyrë, ndërsa afati prej 12 ditësh për përmbylljen e procesit do të fillojë të rrjedhë vetëm pas publikimit të aktgjykimit. Ajo që bie në sy është se Gjykata Kushtetuese i referohet rregullores së Kuvendit të vitit 2022, e hartuar dhe votuar nga Vetëvendosje – një detaj që ngre pyetje për konsistencën e shumicës qeverisëse në respektimin e ligjeve që vetë i ka miratuar. Ndërkohë, kryeministri në detyrë Albin Kurti vijon të mbajë njëkohësisht edhe mandatin e deputetit, pavarësisht se Gjykata Supreme e ka shpallur këtë praktikë të paligjshme. Në këtë situatë, institucionet e heshtura dhe mungesa e përgjegjësisë politike po thellojnë krizën kushtetuese të vendit – një krizë që, sipas analistëve, po e lë Kosovën në “vakum demokratik” dhe me besim të zbehur në funksionimin e shtetit ligjor.
