Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Krimet e kryera gjatë luftës në Kosovë vazhdojnë të gjykohen mbi bazën e ligjit penal të ish-Jugosllavisë, përkatësisht atij që ishte në fuqi në kohën e kryerjes së veprave. Kjo po vazhdon të krijojë dilema dhe interpretime të ndryshme në sistemin e drejtësisë. Ish-prokurorja speciale për krime lufte, Drita Hajdari, ka shpjeguar për RTK, se menjëherë pas përfundimit të luftës, Misioni i Kombeve të Bashkuara në Kosovë, kishte nxjerrë rregulloren 1999/24, me të cilën hiqej dënimi me vdekje – në përputhje me standardet evropiane për të drejtat e njeriut. “Përfundimi i luftës na ka gjetur me këtë ligj. UNMIK-u, misioni ndërkombëtar, menjëherë e ka nxjerrë një rregullore, e që ishte rregullorja 1999/24, me të cilën e hoqi dënimin me vdekje,” ka thënë Hajdari. Megjithëse ligjet e reja të Kosovës, përfshirë Kodin Penal të rishikuar, parashohin dënime më të rënda – përfshirë burgimin e përjetshëm – ato nuk mund të zbatohen për krimet e kryera gjatë viteve 1998-1999, për shkak të parimit të ligjit më të favorshëm për të pandehurit. “Dënimi i përjetshëm nuk ka ekzistuar në kohën kur janë kryer këto krime, prandaj nuk mund të shqiptohet. Asnjë dënim tjetër më i rëndë se ai prej 20 vjetësh burgimi nuk mund të zbatohet për ato raste,” theksoi ajo. Hajdari gjithashtu ka kërkuar një qëndrim të unifikuar gjyqësor, duke theksuar se mungesa e konsistencës ligjore po sjell interpretime të ndryshme nga gjykatat.
