Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i OVL-UÇK-së, Hysni Gucati, ka ftuar Prokurorinë e Shtetit ta vazhdojë punën e ish-prokurorit special Elez Blakaj, i cili ka qenë duke e hetuar keqpërdorimin e listave të veteranëve të UÇK-së. Ai ka thënë për gazetën “Epoka e re” se Prokuroria duhet ta çojë deri në fund këtë çështje dhe ta zbardhë të vërtetën. “Nëse Blakaj ka dhënë dorëheqje, besoj se shteti i Kosovës ka prokurorë të tjerë që ta vazhdojnë punën aty ku e ka lënë Blakaj. Pra, ky proces nuk duhet të ndalet këtu e të bëhen shumë thashetheme me lista të veteranëve. Puna duhet të vazhdojë dhe kjo çështje të mbyllet njëherë e përgjithmonë”, ka thënë Gucati. Ai ka komentuar edhe deklaratën e kryeprokurorit Aleksandër Lumezi, të ketë thënë se rreth 19 mijë veteranë kanë fituar statusin kundërligjshëm. “Edhe unë e lexova deklaratën e kryeprokurorit Lumezi. Tani nuk e di çfarë pret Lumezi dhe Prokuroria e Shtetit që nuk ndërmarrin diçka. Unë i bëj thirrje kryeprokurorit Lumezi t’i marrë të gjitha masat dhe të vazhdojë punën që i takon, nëse kanë prova që rreth 19 mijë veteranë fituan statusin kundërligjshëm”, është shprehur Gucati.
Kryetari i OVL-UÇK-së ka treguar edhe për komunikimin që ka pasur me ish-prokurorin special Elez Blakaj para disa muajve. Sipas Gucatit, ish-prokurori që ka hetuar këtë çështje e ka pyetur nëse është në dijeni që janë fryrë listat e veteranëve të UÇK-së. “Unë jam kontaktuar një herë nga Elez Blakaj para dy-tre muajve. Ai më ka pyetur mua në cilësinë e kryetarit të OVLUÇK-së, se çka mendoj për fyerjen listës së veteranëve. Pra, krejt ajo që më ka pyetur është se a jam në dijeni se janë fryrë listat”, ka thënë ai, duke treguar përgjigjen që ia ka dhënë ish- prokurorit. “Unë qëndrimin tim rreth kësaj çështje e kam bërë publik edhe më herët përmes medieve, ku kam thënë se listat e veteranëve janë të fryra dhe kërkojmë drejtësi”, ka thënë Gucati. Sipas tij, Blakaj i ka treguar se për këtë çështje janë duke u bërë hetime dhe nuk ka thënë diçka nëse ndihet i kërcënuar nga dikush apo jo. Kryeprokurori i Shtetit, Aleksandër Lumezi, ka deklaruar të enjten se janë rreth 19 mijë persona që jashtëligjshëm kanë fituar statusin e veteranit të luftës së UÇK-së dhe marrin përfitime nga shteti.
