Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Legjislatura e IX e Kuvendit të Kosovës, e cila u shpërbë më 20 nëntor, mbylli mandatin pa miratuar asnjë ligj dhe pa arritur të formojë Qeverinë, megjithëse deputetët e saj morën pagat e plota për shtatë muaj rresht. Nga 19 prilli deri më 20 nëntor, paga dhe mëditjet e 120 deputetëve i kushtuan buxhetit të Kosovës 1,515,490 euro. Mesatarisht, secili deputet – shpesh me pjesëmarrje vetëm disa minuta në seancë – ka përfituar rreth 13 mijë euro për periudhën shtatëmujore. Për shkak të tranzicionit mes pozitave qeveritare dhe mandatit të ri parlamentar, 50 deputetë figuronin në listë me nga një pagë të plotë shtesë, duke kapur shifrën prej mbi 95 mijë euro. Pagat mujore të deputetëve kapën rreth 200 mijë euro çdo muaj, ndërsa vetëm në maj u ekzekutuan rreth 235 mijë euro, përfshirë pagën bazë prej 1859 euro dhe shtesat sipas përvojës. Legjislatura e IX do të mbahet mend për bllokadën e pazakontë institucionale, e cila nisi me mosmarrëveshjet për zgjedhjen e kryetarit të Kuvendit, vijoi me bllokimin e nënkryetarëve nga komunitetet dhe u thellua më tej me dështimin për të votuar dy herë Qeverinë – së pari kandidaturën e Albin Kurtit, e më pas të Glauk Konjufcës. Me 20 nëntor, Presidentja Vjosa Osmani shpërndau Kuvendin, duke hapur rrugën për zgjedhjet e parakohshme të 28 dhjetorit, pas një legjislature që de facto mbeti joaktive dhe pa asnjë produkt ligjor.
