Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas vendimit të Gjykatës Kushtetuese për të pezulluar procesin e konstituimit të Kuvendit deri më 30 shtator, ka reaguar kryetari i Lidhjes Demokratike të Kosovës, Lumir Abdixhiku. Ai e ka cilësuar situatën e krijuar si pasojë të drejtpërdrejtë të popullizmit dhe mungesës së vizionit politik nga qeverisja aktuale. “Masë tjetër, bllokadë tjetër. Padituria kushton. Ja ku na ka sjellë popullizmi. Një shtet i tërë i bllokuar, për një pozitë të parëndësishme partiake në Kuvendin e Kosovës. Edhe 30 ditë të tjera të humbura – minimalisht. Tridhjetë ditë të tjera pa institucione funksionale, pa ligje që bëhen, pa projekte që ecin”, ka shkruar Abdixhiku. Kreu i LDK-së tha se Kosova po hyn në një krizë të panevojshme institucionale, ndërsa ironizoi qasjen e pushtetit ndaj raportit me Serbinë: “Si po humbka Serbia kështu? Ne të bllokuar për një nënkryetar të parëndësishëm, e ata humbës disi?!” Abdixhiku theksoi se shkatërrimi i institucioneve dhe shkelja e Kushtetutës po bëhet për interesa të ngushta elektorale, duke akuzuar qeverinë për mungesë projektesh dhe përballje me afera korruptive. “U thamë. Nuk dëgjuan. U treguam. Nuk panë. Kështu ndodhë kur shkatërruesit e shtetit, shkelësit e 48 herë Kushtetutës rresht, për synim nuk kanë atdheun, por kauzën elektorale për një votë a dy,” ka shtuar ai. Ai përfundoi reagimin me mesazhin se “koha e shkatërruesve të shtetit duhet të mbarojë – dhe po mbaron”.
