Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analistja politike, Magbule Sadri Shkodra, ka reaguar ashpër pas zhvillimeve të fundit politike dhe sinjaleve që Bashkimi Evropian ka dhënë ndaj institucioneve të Kosovës. Në një deklaratë publike, Shkodra tha se BE-ja i ka mbyllur dyert qeverisë në detyrë, duke e konsideruar këtë si një shuplakë të rëndë për Kosovën dhe një mesazh të qartë se mungesa e respektimit të kushtetutës dhe vendimeve të gjykatave nuk tolerohet nga partnerët ndërkombëtarë. Ajo shtoi se kjo situatë nuk përfaqëson vetëm dështim të një partie politike, por është poshtërim për gjithë shtetin dhe qytetarët e tij. “Kur institucionet tona shmangen nga partnerët më të rëndësishëm ndërkombëtarë, kjo tregon krizë të thellë besueshmërie. Fajtor nuk është populli, por pushteti që ka vendosur të injorojë rregullat dhe të sfidojë rendin kushtetues,” theksoi Shkodra. Sipas saj, çmimin e këtij kaosi politik nuk e paguan vetëm qeveria, por çdo qytetar i vendit, duke e bërë Kosovën më të izoluar dhe më të dobët në skenën ndërkombëtare. “Ky është një alarm i madh për demokracinë dhe për të ardhmen tonë evropiane,” përfundoi Shkodra.
