Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 16 nëntor 2025, në Strasburg do të mbahet një protestë gjithëpërfshirëse kundër procesit gjyqësor që po zhvillohet në Hagë ndaj ish-luftëtarëve të Ushtrisë Çlirimtare të Kosovës dhe ish-drejtuesve të institucioneve të Republikës. Thirrja publike është bërë nga “Këshilli Koordinues i Shoqatave të dala nga Lëvizja dhe Lufta Çlirimtare e Popullit Shqiptar”, i cili ka ftuar mërgatën dhe të gjithë qytetarët t’i bashkohen këtij organizimi. Në komunikatën e tyre, organizatorët e kanë cilësuar Gjykatën Speciale si një mekanizëm që, sipas tyre, ka marrë karakter të njëanshëm dhe selektiv. Ata theksojnë se në vend që të trajtojë krimet e kryera nga Serbia pushtuese ndaj popullit shqiptar, procesi po shndërrohet në një gjykim politik ndaj vetë Luftës Çlirimtare të Kosovës – luftë që, siç theksojnë, ka qenë e drejtë, mbrojtëse dhe e përkrahur nga Shqipëria, NATO dhe bota demokratike. Protesta synon të përcjellë një mesazh të fuqishëm ndërkombëtar se mërgata dhe qytetarët shqiptarë nuk do të heshtin përballë, siç e quajnë ata, padrejtësive që po u bëhen ish-pjesëtarëve të UÇK-së. Organizatorët pritet të publikojnë së shpejti detaje të tjera logjistike dhe të marrjes pjesë.
