Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komandanti i KFOR-it, gjenerali Ozkan Ulutaş, ka deklaruar se situata e sigurisë në Kosovë është aktualisht e qetë, por mbetet e brishtë dhe e ndjeshme ndaj rritjes së tensioneve. Ai theksoi se prioriteti kryesor i KFOR-it është garantimi i një mjedisi të sigurt dhe lirisë së lëvizjes për të gjitha komunitetet, në përputhje me mandatin e OKB-së. Ulutaş rikujtoi se pas ngjarjeve të dhunshme të vitit 2023, NATO-ja ka dërguar deri në 1.000 trupa shtesë, duke e çuar numrin e përgjithshëm të ushtarëve të KFOR-it në mbi 5.000. Sipas tij, misioni mbetet vigjilent dhe i gatshëm të reagojë paanshëm në çdo situatë. Ai theksoi praninë e shtuar të KFOR-it në gjithë Kosovën, përfshirë komunat veriore, si dhe bashkëpunimin e ngushtë me Policinë e Kosovës, EULEX-in dhe aktorët ndërkombëtarë. Sipas komandantit të KFOR-it, stabiliteti afatgjatë nuk mund të arrihet me mjete ushtarake, por përmes dialogut politik mes Prishtinës dhe Beogradit, të ndërmjetësuar nga Bashkimi Evropian. Ulutaş nënvizoi se KFOR-i vepron në mënyrë të paanshme dhe në interes të të gjitha komuniteteve, duke hedhur poshtë pretendimet për mungesë të mbrojtjes ndaj ndonjë komuniteti të caktuar. Sa i përket të ardhmes së misionit, ai tha se çdo vendim për tërheqje do të varet nga situata e sigurisë dhe vendimet e NATO-s, në përputhje me Rezolutën 1244 të OKB-së.
