Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministri i Mbrojtjes i Shqipërisë, Pirro Vengu, ka deklaruar se Shqipëria, Kosova dhe Kroacia nuk kanë nevojë të marrin leje nga askush për të nënshkruar marrëveshjen trepalëshe në fushën e mbrojtjes, duke theksuar se kjo iniciativë nuk është ndërtuar kundër asnjë vendi. I pyetur për reagimet e presidentit serb Aleksandër Vuçiq, Vengu tha se ka vënë re “një sens paniku” nga deklaratat zyrtare në Beograd, por sqaroi se marrëveshja synon stabilitetin dhe sigurinë rajonale. “Kam qenë unë vetë i pari që kam shprehur ftesë që edhe Serbia, nëse gjykon se stabiliteti, qëndrueshmëria dhe e ardhmja euroatlantike e rajonit janë të rëndësishme, t’i bashkëngjitet kësaj iniciative. Nuk kam marrë asnjë përgjigje për këtë ftesë,” u shpreh Vengu. Ai bëri të ditur se në bazë të marrëveshjes, Shqipëria, Kosova dhe Kroacia kanë nisur bashkëpunimin në disa fusha, përfshirë atë ushtarake, stërvitore, akademike-arsimore dhe prodhimin ushtarak. Më tej, ministri sqaroi se me Kosovën ka dakordësi konkrete për mjete të blinduara, duke përmendur dy arsye kryesore: rreziqet dhe kërcënimet reale në rajon, si dhe nevojën për rritjen e kapaciteteve mbrojtëse. “Ne mikpresim edhe vende të tjera që t’i bashkëngjiten kësaj nisme. Është një partneritet i hapur. Të tre vendet kanë nevoja të ngjashme për rritjen e kapaciteteve në fushën e mbrojtjes,” përfundoi Vengu.
