Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Themelore në Prishtinë e ka shpallur fajtor Millosh Pleskoviqin për krime lufte kundër popullatës civile dhe e ka dënuar me 15 vjet burgim.
Dënimi me 15 vjet burgim për Pleskoviç do të ekzekutohet në afat prej 15 ditësh nga plotfuqishmëria e aktgjykimit.
Sipas aktakuzës së ngritur nga Prokuroria Speciale më 7 qershor 2024, Pleskoviq akuzohej se gjatë viteve 1998-1999 në Prizren, në bashkëkryerje me një grup serbësh të armatosur, kishte vrarë tre civilë shqiptarë dhe kishte plagosur disa të tjerë.
Prokuroria e kishte akuzuar atë për shkelje të rënda të së drejtës ndërkombëtare humanitare, duke vepruar drejtpërdrejt kundër personave civilë gjatë luftës në Kosovë.
Pleskoviq ishte pjesëtar i forcave serbe.
Pas seancës, nëna dhe motra e dy viktimave thanë se Millosh Pleskoviq ishte përgjegjës për vrasjen e familjarëve të tyre.
“Mi ka mbyt dy djemtë, 29 vjeç i kanë pas”, tha nëna e viktimave.
Ndërsa motra e tyre e quajti dënimin prej 15 vitesh shumë të ulët. “Pak është. Ai i ka njohur vëllezërit e mi, ka qenë nga lagjja jonë. I ka zënë në mal, i ka vrarë dhe masakruar. Ai ka vrarë edhe të tjerë nga Prizreni”, tha ajo.
