Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Prokuroria Speciale e Kosovës ka njoftuar se i ka dërguar një kërkesë zyrtare autoriteteve kroate për sigurimin e provave në lidhje me arrestimin e shtetases serbe nga Mitrovica e Veriut, Ana Murganiq, e dyshuar për spiunazh së bashku me partnerin e saj, pilot në Ushtrinë Kroate dhe ish-pjesëtar i KFOR-it në Kosovë. Prokuroria ka konfirmuar se është në kontakt të vazhdueshëm me institucionet përkatëse dhe do të ndërmarrë veprime ligjore në përputhje me marrëveshjet për bashkëpunim juridik ndërkombëtar. Ana Murganiq dhe partneri i saj ndodhen në paraburgim prej 30 ditësh, pasi dyshohen se kanë transmetuar informacione te Lista Serbe për zhvillimet në veri të Kosovës, përfshirë edhe të dhëna konfidenciale të KFOR-it. Mediat kroate raportojnë se Murganiq kishte qenë pjesë e EULEX-it dhe UNMIK-ut, duke u dyshuar se ishte infiltruar nga shërbimet sekrete serbe. Zëdhënësi i Gjykatës së Qarkut të Splitit, Neven Cambj, tha se hetimi është sekret, ndërsa dënimi për veprën e spiunazhit në Kroaci parashikon nga një deri në dhjetë vjet burgim. Avokatja mbrojtëse e të dyshuarve ka deklaruar se klientët e saj janë shpallur të pafajshëm dhe kanë paraqitur ankesë. Ndërkohë, Zyra e Presidentit kroat, Zoran Milanoviq, ka bërë të ditur se ai ishte i informuar për rastin që nga fillimi dhe ka mbështetur fuqishëm institucionet që po e hetojnë çështjen.
