Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Speciale në Hagë ka marrë vendim që disa pjesë të transkriptit të seancës së 27 marsit 2025, të cilat deri më tani ishin konfidenciale, të bëhen publike. Bëhet fjalë për fragmente ku ish-presidenti Hashim Thaçi kishte shprehur shqetësimin e tij për praninë e prokurorit John Devaney, pjesë e Zyrës së Prokurorit të Specializuar, i cili më herët kishte punuar në Njësinë e Menaxhimit të Paraburgimit. Mbrojtja e Kadri Veselit kishte kërkuar që këto pjesë të ri klasifikohen si publike, duke argumentuar se ato nuk përmbajnë informacione që bien nën masa mbrojtëse dhe se transparenca është thelbësore për një proces gjyqësor të drejtë. Nga ana tjetër, Prokuroria kishte kundërshtuar, duke theksuar se bëhet fjalë për diskutime me elemente private dhe profesionale, si dhe akuza të pabazuara ndaj stafit, që sipas tyre duhet të mbeten konfidenciale. Pas shqyrtimit, trupi gjykues ka vlerësuar se vetëm fragmentet që lidhen me çështje të brendshme të sigurisë dhe operimit të Qendrës së Paraburgimit duhet të mbeten të redaktuara. Ndërkaq, pjesët e tjera të seancës do të bëhen publike, pasi nuk përmbajnë të dhëna konfidenciale apo të mbrojtura me masa të posaçme. Ky vendim pritet të rrisë transparencën e procesit gjyqësor ndaj Thaçit, Veselit, Selimit dhe Krasniqit, të cilët po gjykohen për krime lufte dhe krime kundër njerëzimit.
