Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kosova po përfshihet gjithnjë e më shumë në marrëveshje për strehimin e emigrantëve dhe të burgosurve të huaj, duke ngritur shqetësime për mungesë transparence dhe prioritetesh kombëtare nga ana e qeverisë. Pas marrëveshjes me Danimarkën për dhënien me qira të Burgut të Gjilanit për të burgosur danezë, tani është bërë e ditur se edhe Belgjika ka shprehur interesim për shfrytëzimin e institucioneve korrektuese të Kosovës. Në të njëjtën kohë, kryeministri Albin Kurti deklaroi në Londër se Kosova është e gatshme të strehojë azilkërkues të refuzuar nga Britania e Madhe, në këmbim të “mbështetjes në fushën e sigurisë”. Ky pozicionim ka shkaktuar reagime të ashpra nga organizatat për të drejtat e njeriut, të cilat paralajmërojnë se Kosova po rrezikon të kthehet në qendër pritjeje për refugjatë e të dënuar, vetëm për përfitime financiare. KMDLNJ, e ka quajtur këtë praktikë “të rrezikshme dhe poshtëruese për shtetin”, duke theksuar se siguria dhe dinjiteti kombëtar nuk mund të shiten me para. Ndërkohë, Shërbimi Korrektues i Kosovës ka pranuar se ka pasur interesim nga Belgjika, por asnjë dokument zyrtar nuk është paraqitur ende — duke shtuar dyshimet për negociata të fshehta. Kritikët thonë se qeveria po e përdor Kosovën si terren eksperimental për interesat e vendeve perëndimore, në vend që të përmirësojë kushtet e qytetarëve të saj.
