Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i AAK-së, Ramush Haradinaj, ka deklaruar mbështetjen e tij të fuqishme për protestën gjithëkombëtare që pritet të mbahet më 17 tetor në Tiranë. Kjo protestë ka për qëllim kërkimin e drejtësisë për ish-krerët e Ushtrisë Çlirimtare të Kosovës, të cilët po përballen me gjykim në Hagë nga Gjykata Speciale. Haradinaj, përmes një postimi publik, ka shpërndarë posterin zyrtar të kësaj ngjarjeje, duke theksuar se qëndron fuqishëm në anën e luftës së drejtë të UÇK-së. “Qëndrojmë gjithmonë në të drejtën e luftës sonë për liri”, ka shkruar ai, duke i bërë thirrje qytetarëve që ta shohin këtë protestë jo vetëm si një akt solidariteti, por edhe si një obligim kombëtar. Sipas tij, procesi gjyqësor në Hagë ndaj udhëheqësve të UÇK-së nuk është vetëm çështje individuale, por një përpjekje për të vënë në pikëpyetje vetë legjitimitetin e luftës çlirimtare të shqiptarëve. Ai ka nënvizuar se drejtësia duhet të shërbejë për të ndriçuar të vërtetën e luftës, e jo për ta zbehur atë. Protesta e 17 tetorit paralajmërohet të jetë një ngjarje masive, me pjesëmarrje të qytetarëve nga të gjitha trojet shqiptare – Kosovë, Shqipëri, Maqedoni e Veriut, Mal i Zi – si dhe nga diaspora. Mbështetja e Haradinajt shihet si e rëndësishme, duke qenë vetë një nga komandantët e njohur të luftës së Kosovës dhe figurë politike me peshë në diskursin për drejtësinë ndërkombëtare.
