Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Aleancës për Ardhmërinë e Kosovës, Ramush Haradinaj, ka zhvilluar një takim në Kongresin Amerikan me kongresistin republikan Pete Sessions, ku ka kërkuar mbështetjen e administratës së Presidentit Trump dhe të Kongresit për anëtarësimin e Kosovës në NATO. Gjatë vizitës në Washington, Haradinaj ka theksuar rëndësinë e partneritetit strategjik mes Kosovës dhe Shteteve të Bashkuara të Amerikës, duke e cilësuar atë si bazë për thellimin e bashkëpunimit në fushën e sigurisë dhe angazhimeve globale. Në një video të publikuar në rrjetet sociale, Haradinaj dëgjohet duke thënë se Kosova është e gatshme t’i bashkohet SHBA-së në të gjitha aspektet e angazhimit global, përfshirë edhe përmes anëtarësimit në Aleancën Veri-Atlantike. Nga ana e tij, kongresisti Sessions ka deklaruar se në Washington duhet bërë “punë më e mirë” për ta theksuar mbështetjen ndaj Kosovës, duke shtuar se personalisht është i angazhuar në këtë drejtim. Takimi vjen në kuadër të vizitave dhe kontakteve të zyrtarëve politikë kosovarë në SHBA, me fokus në forcimin e përkrahjes ndërkombëtare për integrimet euroatlantike të vendit.
