Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Pas përsëritjes së votimeve në shtatë qendra në zonat zgjedhore 5 dhe 6 në Maqedoninë e Veriut, BDI dhe koalicioni Fronti Evropian humbën një vend deputeti, ndërsa koalicioni Vlen fitoi një vend shtesë në parlament. Rivotimi në fshatin Llërcë të komunës së Zhelinës rezultoi në fitore për koalicionin Vlen, duke e çuar numrin e tyre të ligjvënësve në 14. BDI dhe koalicioni i tij tani kanë 18 deputetë, aq sa edhe Lidhja Social Demokrate, duke mos qenë më forca e dytë politike në vend. Në zonën e pestë, që përfshin Ohrin, Strugën dhe Krushevën, rivotimi në gjashtë qendra nuk ndryshoi rezultatin e deputetëve. Ndërkohë, Vlen dhe VMRO akuzuan BDI-në për blerje votash dhe trysni ndaj votuesve. VMRO dhe Vlen pritet të bien dakord për ndarjen e ministrive dhe programin qeveritar të drejtuar nga Hristijan Mickovski, megjithëse ende nuk kanë shpjeguar qëndrimin për ndryshimet kushtetuese që përfshijnë pakicën bullgare, një kusht për integrimin në BE. Në Shkup ka shqetësime për izolimin e mundshëm të vendit nëse nuk respektohen marrëveshjet me Greqinë dhe Bullgarinë.
