Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Partia Socialdemokrate, sot ka zhvilluar një protestë të fuqishme, në Prishtinë, në përpjekje për të penguar konferencën e kryetares së Gjykatës Speciale, Ekaterina Trendafilova, e cila, e paftuar nga askush po qëndron për vizitë në Kosovë.
Kjo protestë, e cila u përgjak nga policia e Qeverisë Kurti, në jugomediet dhe at0 të varura nga politika, po quhet aksion simbolik, me qëllim për ta zhvlerësuar protestën, në të cilën u përgjak madje edhe kryetari i partisë, Dardan Molliqaj. Policia e Kosovës gjatë arrestimit ka përdorur dhunë jashtëzakonisht të madhe ndaj aktivistëve duke i lënduar ata. Në fotot e publikuara shihet se Dardan Molliqaj është gjakosur në fytyrë gjatë arrestimit. Policia e Kosovës ka arrestuar kryetarin e kësaj partie, Dardan Molliqaj dhe aktivistët: Teutë Rrusta, Zgjim Hyseni, Qëndrim Sahiti dhe Agron Kabashi.
Protesta kishte filluar gjatë raportimit të kryetares së Gjykatës Speciale, Ekaterina Trendafilova, në Prishtinë. Aktivistë të PSD-së, Lisjan Perolli dhe Bardh Ahmeti, zhvilluan aksion, me qëllim për të penguar rilegjitimimin e Gjykatës Speciale në misionin e saj për të tjetërsuar luftën çlirimtare të UÇK-së. Gjatë aksionit, jashtë konferencës për media, Policia e Kosovës përdori dhunë jashtëzakonisht të madhe ndaj aktivistëve duke i lënduar dhe i arrestuar ata. Aktivistët e PSD-së thanë se Gjykata Speciale është e padrejtë, prandaj ajo nuk mund të sjellë drejtësi. Si e tillë, nuk mund të lejojmë asesi që të rilegjimitohet në qetësi teksa tjetërson historinë tonë.
Qëndrimin e zonjës Trendafilova në Prishtinë nuk e kanë kundërshtuar madje as veteranët e luftës së UÇK-së, as kryetarët e partive politike, që pretendojnë se kanë dalë nga lufta e UÇK-së, natyrisht as Qeveria Kurti e cila po bashkëpunon me Gjykatën Speciale.
Ky qëndrim në dukje indiferent, është qëndrim pacifist dhe nënshtrues, për faktin se kryetarja e Gjykatës Speciale po qëndron në Prishtinë, e paftuar, në një vizitë mbase me një protokoll të veçantë, por gjithësi me një prapavijë protektore dhe përbuzëses madje edhe për Qeverinë e Kosovës, sepse zonja Trendafilova nuk është thjesht një prokurore, gjyqtare apo avokate, e cila mund të xhezdis kudo nëpër Kosovë, pa paralajmëruar askë, por është kryetare e një Gjykate e cila ka për qëllim që luftën çlirimtare të UÇK-së ta trajtojë si luftë të gjoja bashkimit të grupeve kriminale, duke përbuzur e poshtëruar edhe gjakun e derdhur rrëke të dëshmorëve e martirëve, të rënë për lirinë e Kosovës.
Qëndrimi i kryetares së Gjykatës Speciale, Ekaterina Trendafilova, në Prishtinë, nuk i ka prishur fare rehatinë, Albin Kurtit as trimave e trimëreshave “të dëshmuara” të kësaj partie, në të cilën dikur bënin pjesë aktivitet e sotëm e PSD-së, të ndarë nga ajo në kushte dhe rrethana, të cilat i di opinioni në Kosovë e më gjerë. Dikur Albin Kurti me të vetët përmbysnin xhipat e UNMIK-ut dhe EULEX-it. Ata përballeshin me policinë, pikërisht për të njëjtat motive. Madje nuk është për tu habitur nëse dikush nga Qeveria e fton në bisedë mikpritëse zonjën e vogël, të Gjykatës së Madhe, e cila ka ardhur e paftuar ashtu sikur vinte dikur gjykatësja hetuese serbe, Danica Marinkoviq.
Është fat i madh që indiferencën e sotme morbide, dekadente e të panatyrshme të institucioneve të Kosovës e thyen aktivistët e PSD-së, të cilët madje edhe u rrahën brutalisht nga policia e Kosovës, sikur ka ndodhur edhe shumë herë në aksione të tilla të kësaj partie të vërtetë opozitare në Kosovës, rreth së cilës do të duhej të rreshtoheshin opozitarët e vërtetë të vendit e jo dekadentet e shpërfytyruar sa e sa herë në momentet sikur ky i sotmi.
PSD-ja me aksione të tilla, jo simbolike, por në vazhdimësi të përgjakshme, por tregon se është e vetmja forcë e vërtetë opozitare në Kosovë, e cila tani për tani po përballet me keqqeverisjen, mbajtjen në arrest, keqtrajtimin e krerëve të luftës së UÇK-së dhe degradimin e pavarësisë së Kosovës.
Është për të ardhur keq edhe për qëndrimin tejet indiferent të përfaqësuesve të shoqatave të dala nga lufta e UÇK-së, të cilët, në rast si kjo e vizitës së kryetares së Gjykatës Speciale në Kosovë, të paktën do të duhej të reagonin deklarativisht, sikur kanë bërë në vitet e fundit dhe të mos pajtohen me vizitën e paftuar të kryetares së Gjykatës Speciale, e cila luftën e UÇK-së e trajton si luftë terroristësh.
Jemi mësuar me deklaratat e vonuara të krerëve të shoqatave, por në raste si ky i sotmi, çdo vonesë është e pafalshme dhe e vë në pikëpyetje vetë punën dhe ekzistencën e shoqatave, të cilat i bindën verbërisht politikanëve dhe qeverisë së Kosovës.
Reagimi me vonesë, për të cilin besojmë se do ta bëjnë veteranët, megjithatë flet për mungesë gatishmërie e serioziteti, flet për një situatë konfuze dhe për mungesë unifikimi të qëndrimeve, thjesht flet për një rezignatë pasive, e cila ka kohë që mbretëron në organizatat e dala nga lufta e UÇK-së. Pacifikimi i këtyre organizatave nënkupton lodhje nga brenda, parazitizëm, pajtim me realitetin dhe dorëzim në kohën. kur por bëhen përpjekje të fuqishme, madje strategjike të qarqeve antishqiptare, për ta deformuar luftën e UÇK-së dhe për ta vënë në dilemë edhe lirinë e pavarësinë e Kosovës.
Pavarësisht se çka do të sjellin ditët në vijim, është fat për vendin dhe historinë e Kosovës që disa aktivistë atdhetarë, sikur këta të PSD-së u gjenden në ballë të detyrës, jo për të fituar poenë politikë, por për të fituar Kosova dinjitet të vazhdimësisë së saj çlirimtare, në rrugën e mbrojtjes me çdo kusht të vlerave të luftës dhe të gjithë atyre, të cilët po pretendon t’ i viktimizojë e t’ i diskreditojë.
