Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-ambasadori holandez në Kosovë, Robert Bosch, ka shprehur shqetësimin për mungesën e institucioneve të reja në vend, ndonëse kanë kaluar tetë muaj nga zgjedhjet e mbajtura në shkurt. Bosch ka theksuar se zvarritja e formimit të Qeverisë ka dëmtuar seriozisht imazhin ndërkombëtar të Kosovës, duke shtuar se për këtë situatë faj ndajnë të gjitha partitë politike. “Ritmi i ngadaltë i formimit të qeverisë ka dëmtuar gjithashtu imazhin e Kosovës, por të gjitha partitë politike duhet të fajësohen. Kur nuk ka një mazhorancë të dukshme, duhen bërë kompromise”, deklaroi Bosch. Sipas tij, mungesa e gatishmërisë për kompromis politik po e pengon funksionimin demokratik të institucioneve dhe po krijon një perceptim të brishtë për stabilitetin politik të vendit. Në vazhdim të intervistës, ish-diplomati holandez ka folur edhe për procesin e dialogut Kosovë–Serbi, ku ka shprehur kritika ndaj Bashkimit Evropian për qasjen e pabarabartë dhe favorizuese ndaj Beogradit, duke nënvizuar se kjo politikë po e minon besueshmërinë e BE-së në rajon. Sipas Boschit, Kosova ka nevojë për udhëheqje të përgjegjshme dhe koordinim të qartë ndërpartiak, në mënyrë që të rifitojë besimin e partnerëve ndërkombëtarë dhe të shmangë përsëritjen e krizave politike që dëmtojnë rrugëtimin e saj drejt integrimeve evropiane.
